GENAHSYDE. -A Jamaican Love Story.

EPILOGUE!

ZIDANE!
One Year Later!

"I now pronounce you Husband and Wife. You may kiss the Bride." Di Pastor announce.

Looking pan mi beautiful Queen infront a mi...jah jah Kendra Garcia now Mrs Gonzalez mi smile down pan har. Pulling har in gently mi gi har a alluring kiss. Wah mi been a wait fi gi har from mi see har a walk up di aisle.

Di applause start and di audience guh wild. Kens mek sure tell mi she nuh waah nuh boasty kiss pan har special day. Fuck wah people think a fi wi wedding, she waah a kiss wah ago left har longing fi more...and anyting Wifey say dat is it.

Wi decide fi have di wedding a Trident Castle Port Antonio, Portland. Well kinda mi still from Candice mention di famous private chapel inna last year been a pree di spot. Find out say Kens pregnant di day afta everyting gwan a View inna last year. And a did best gift dat she coulda eva gimme. Suh between di pregnancy, work, running har business dem and di wedding plan...yuh know who get drag inna di mix. Neva mind still know a mi life line wi a talk bout...plus at di same time she did a carry life inna har stay speed.

She di waah a destination wedding at first. And di wedding before Zion fahwud ...before she start show, but dat woulda be too much pressure. Suh she say a Jamaica den, but weh? And deh suh mi drop Trident Castle inna di picture classy and elegant. Plus it work out fi everybody, cause most a di man dem nuh have a visa and sum a di family memba dem. Dat a quick maths still, but wid everyting wah did a gwan if mi coulda avoid any hassling mi try fi avoid it...suh dat work out fi di best.

Di wedding ceremony joyous wid bay love and di energy and vibes just right. Neva understand di wul heap a plan ting, but now mi see say it crucial fi ensure everyting guh smooth. Plus gi yuh a memorable experience both wi and di guests.

From di processional order to di vows and exchange a di rings, every element have it place inna creating a beautiful and harmonious celebration a love.

Walk in inna full white custom made suit wid a touch a gold and a bad bumboclat white Desert Clarks mi have ship from England. Done know as a wickman cah fuck wid di image. See di man dem clean inna dem burgundy suit dem. Only get Lans, Ghana and Jubba fi be mi best man, cause Kens nuh too big pan di friend friend ting. Suh dat just left har wid Mel, Candice and har bredda girl Jessica fi har maid of honor dem.

Mommy and Miss Charmaine get escort to dem seat inna di front row wid mi bad bwoy Zion. Looking like a dem a married, love how dem friendship grow stronga ...dem inseparable now. Follow by di flower girl and ring bearer Candice lickle girl Chole and Kia.

And den di woman a di hour mi Queen escort by Kingsley and Uncle Sunny down di aisle. Wid Major why I love you playing softly inna di background. Tell di man dem a di only pussyclat day dem eva a see mi bawl. Kendra inna a white and gold dress like sumting outta a story book or dem princess show/cartoon deh. Har dress hug har middle section and display just di right amount a har plump breast dem (cause from she have Zion, a like a surgery she do...love dem yuh fuck) and den it just puffy and flow outta di end. Wid a gold crown display sum beautiful gems and har veil attach to har cute bun ting. Nuh haffi question Kens beauty, but today a one fi di books. Nuh word nuh good enough fi describe how breathtaking she look.

Guh through di ceremony nuh really sure wah di Pastor say too tuff. Cause all mi cah focus pan a di woman infront a mi. Wonda if a mistake God gimme har by, cause not even fi a second mi nuh deserve dis beautiful, enchanting, pure, God bless, kindhearted woman infront a mi. But best believe mi a cherish every moment wid har until mi last breath.

Den she guh write mi di best vow mi eva hear inna history. Gimme har heart again although mi already have it. And promise mi say a di three a wi till di wheels fall off. Couldn't ask fi nutting more inna life or outta life, cause mi already have everyting mi eva waah. A woman fi love mi fi mi, nuh fi wah mi have or cah gi har. Because she see mi dark side along wid di best version a mi ...wah mi cah see. And decide fi love mi through it all. And den she guh bless mi wid di most precious lickle bwoy mi coulda eva ask fah. Dis a di life mi dream bout just neva sure if mi woulda mek it dis far fi see it. And a one woman play a major role through it all....Kendra Garcia Gonzalez.