سألت أمها قبيل ، قالت لي خالها و داهم البلد و حيرجعهم الأبيض بعد بكرا
= يعنى ما حتجي تحضر عرس حيدر ؟
-عمتو قالت لي مها حتجي الأسبوع الجاي ، ان شاء الله تجي اشتقت ليها والله
=ذاتا كما جات عرس أخوي حزعل منها والله
راقد في السرير و بعاين في السقيف ، سمعت صوت سلمى أختي و ابتهال بت عمي لما كانوا بتونسوا ، و عرفت منهم انو مها جايه الأسبوع الجاي ، ما عارف حسيت بشنو بعد ما سمعت الخبر دا ، بين زعلان و فرحان ، متوتر و متشوق و ملهوف لشوفتها ، حاسس إنو لي سنوات ما شفتها ما 3 شهور.....دا شنو البفكر فيهو دا ؟ هل انا بفكر فيها كدا گ اخت ؟!! ولا ...لا لا مستحيل يكون كدا ، مها زي اختي يمكن عشان اتعاطيت معاها كتير و كنت بعاملها معامله خاصه و غير و كنت بستثنيها في كل شي عشان ما تحس انها وحيده و ما عندها زول بسندها أو بقيف معاها ، اتعودت عليها و على طبعها ، اشتقت ليها و لعنادها و قوة راسها ، و يمكن الأحاسيس المبعثره الجواي حاليا دي سببها الولف ، و زي ما بقولوا الولف كتال ♥️.
-يعنى والله يا مها بتي بتبالغي عديل ، جبتيها معاك لشنو عليك الله
قلت ليها يا خالتو رانيا ما قدرت أخليها براها و ما تنسى ديل كانوا جيرانكم ، قالت لي البت دي مسؤولية والله و انا ما بقدر اتحمل مسؤوليتها ، ريم قالت لي هسي انتي جايباها معاك لشنو ؟ قلت ليها البت كانت براها و ما معاها زول لو كنتي مكاني كان حتخليها براها ؟...أخدت نفس و قلت ليهم أمها و أختها شكلهم رجعوهم الجنوب ، قالت لي و هي لشنو ما رجعوها معاهم ؟ ما فاهمه حاجه يا مها ، هم مش قبل يومين مشوا الخرطوم عشان يزوروا خالتهم ؟طيب دي كيف قدرت تجي هنا براها و هي في السن دا ؟الجابها منو ، قلت ليها حسب الكلام القالتو لي ، إنهم لمن مشوا الخرطوم ، جوهم عساكر و ساقوا أمها و خالتها و كرستينا ، هي إدست منهم ، لمن طلعوا طوالي جرت براهم ، ركبوا أهلها في دفار كبير و كان معاهم جنوبيين كتار و اتحركت بيهم ....خالتو رانيا قالت لي سمح هي كيف جات من الخرطوم لسوق "الدبكر"استحاله تكون جات براها صح ؟ قلت ليها ما عارفه جات كيف ، هي تاني ما قالت لي حاجه قدر ما حاولت اعرف منها معلومه زياده ما قدرت ، قالت لي هسي نعمل شنو و نقع بيها وين ؟ نحنا راجعين الأبيض بكرا ، قلت ليها نرجعها معانا لحدي ما نشوف لينا حل ، قالت حيييا انا منك يا مها لكن اسوي شنو عاد ، سمح كدي لحدي بكرا ، هسي قومن غسلن الملابس و أكونها ، قلت ليها حاضر...قالت لي صحي البنيه وينا ؟قلت ليها نايمه جوه من قبيل كانت بتبكي ، قالت لي فراق الأم دا ما حار ....
اليوم دا كلو قضيناه مكوه و غسيل ، بعد المغرب جونا بنات الحله كلهم عشان يتونسوا معانا دي آخر ليله لينا ،، كانت قعده ظررريفه ، سبحان الله مع إني كنت انسانه متوحده و ما بحب اتونس مع زول 😂 اتونسنا لحدي الساعه 11 بليل ، بعدها ودعونا و أي وحده رجعت بيتهم ، في صباح اليوم التالي شربنا الشاي و جهزنا نفسنا ، حليمه يلي هي عمتي أمي و الكنا قاعدين في بيتا قالت لينا ما بتمشوا إلا تفطروا معانا ، رانيا قالت ليها ما بنقدر والله احسن نمشي من هسي عشان ما نتأخر ....بعد شويه سمعنا صوت بوري ، عائشه جات داخله و قالت لينا عمو متوكل دا قال ليكم اسرعوا ، قلت لريم جدي وينو ؟ قالت لي مشى و ركب من قبيل ...المهم ودعناهم و رجعنا الأبيض .
