အန္တရာယ်ရှိသော စရိုက် - ဘာသာပြန်

Chapter 91- သူတို့နှစ်‌ယောက် ဆက်ဆံရေး

Unicode

" မြောင်"

အခုချိန်အထိ နာမည်မရှိသေးသောကြောင်လေးမှာ တံခါး‌ဝရှေ့ ဆောင့်ကြောင့်ထိုင်‌၍ သူတို့ကို စောင့်နေသည်။ နားရွက်လေးကို ခြေဖျားနှင့် တဖျပ်ဖျပ် ကုပ်လိုက် ကော်ရစ်ဒါအပြင်မှ အသံများကို နားထောင်လိုက်နှင့် လုပ်နေရှာသည်။ အိမ်ရှင်ပြန်လာတော့မည်ကို ကြိုသိနေ၍ တစ်ခါတစ်ခါ စိတ်မရှည်ပဲ တံခါးကို လက်နှင့် ကုပ်ဖဲ့နေတတ်သေးသည်။

ထို့နောက် တံခါးလဲ ကလစ်သံတစ်ခုနှင့်အတူ ပွင့်လာသည်။

အမွှေးလုံးလေး အရှေ့သို့ အူယားဖားယား ပြေးသွားသော်လဲ လမ်းတစ်ဝက်တွင် ရပ်တန့်သွား၏။ အေးစက်စက်ကြည့်တတ်သော အိမ်ပိုင်ရှင်အပြင် မျက်နှာချင်းဆိုင်အိမ်တွင်နေသော သူကြည့်မရသည့်လူကြီးပါ အတူပါလာသည်ကို တွေ့လိုက်ရသောကြောင့်ပင်။

အမွှေးလုံးလေး : "..."

ရှဲ့လင်က ဒူးထောက်ကာ နှုတ်ဆက်သည်။
" အသေးလေး"

ကြောင်လေးက ဖြည်းဖြည်းချင်း နောက်ဆုတ်သွားသည်။
" မြောင် (ဘာလို့ထပ်ရောက်လာတာလဲ)"

ရှဲ့လင် : " ငါမလာရင် မင်းကို ဘယ်သူ အစာကျွေးမှာမို့လို့လဲ"

ရှဲ့လင်သည်လဲ ထိုကြောင်ကို မကြည်သည့်တိုင် လူတစ်ယောက်နှင့် ကြောင်တစ်ကြောင်ကြားက ဆက်ဆံရေး တင်းမာမှုမှာ အရင်ကထက် အတော်လေး လျော့ပါးလာသည်။ တစ်ခါတစ်ခါ ရှဲ့လင် လမ်းလျှောက်လာသည်ကို တွေ့သော်လဲ အမွှေးလုံးလေးက အိပ်ပျော်နေရာမှ မျက်လုံးတစ်ဖက်သာ လှန်ကြည့်ဖြစ်၏။

ချီချင်းနှင့် ရှဲ့လင်တို့နှစ်ယောက်မှာ ချိန်းတွေ့ရာမှ မတော်တဆမှုကြောင့် ရဲစခန်းတွင် အချိန်အတော်ကြာ သွားနေလိုက်ရသည်။ ထို့ကြောင့် အချိန်နောက်ကျမှ ပြန်လာဖြစ်လေရာ ကြောင်စာကျွေးချိန် တစ်နာရီတိတိ ကျော်သွားခဲ့လေသည်။

အိမ်ပြန်ရောက်ရောက်ချင်း ချီချင်းလုပ်တတ်သည့်အလုပ်က ရေ‌ချိုးရန်ဖြစ်၏။ ရေချိုးပြီး ထွက်လာသည့်အခါတွင်တော့ ဧည့်ခန်းထဲမှ ကြောင်တစ်ကောင်နှင့် လူသားတစ်ယောက်ကြား အတော်ကြီးကျယ်သည့် ရန်ပွဲတစ်ပွဲဖြစ်နေသည်ကို တွေ့ရလေသည်။