قوت القلوب اللي من الزمن مبليه

Part1

الفقد مسراي واحلامي بعيدة منال
‏كم واحد أشعر بفقده من قبل لا أفقده

‏وش عاد يرضيك ياللي ما كفاك الدلال
‏شرّعت لـ رضاك كل أبوابي الموصده

‏ذابت بقايا فوادي فوق جمرة تعال
‏ما تدري إن الحنين يفتّت الافئده

‏ماعاد لي خاطر يداري غياب ووصال
‏إن جيت يامرحبا وإن رحت في المزهده .

{ديرة هياما تبُعد عن الرياض ٣٠٠كيلو ، تتصف الديرة بجمالية المكان البّري من جبال رملية واراضي واسعة وتزداد بالجمال اكثر وقت فصل الشتاء بالامطار وكذلك فصل الربيع تتميز بالعشب والجو البارد الهادي
•أهالي ديرة هياما ، معروفين بالكرم والسخاء ولكن شديدين السلوم والعادات وتقاليد ومتمسكين بطريق قد سلكوه اجدادهم}
—
اشرقت الشمس وهب نسيم الصباح ، صحت قوت مع صلاة الفجر وخلصت اذكارها ووردها اليومي ودخلت المطبخ عشان تخلص فطور ابوها وتجهز قهوته قبل ماتجي  الساعه سبع ونص ، وبعدها دخلت مخزن المواد الغذائية واخذت طحين بُر وعجنته ودخلته الفرن ، جلست عـ طاولة الطعام الصغيرة تنتظر يفوح غوري حليب الكرك الا شوي تسمع صوت ينادي باسمها ..
ابو قوت ( حسين ) : يالقوووووت وينتس
فزت قوت من سمعت صوت ابوها يناديها وهي تحب اسمها من منطوقه وكونه يناديها باللام والمعنى ،، وراحت له ورفعت صوتها عشان يوصل له نداءها: لبييييييه
وصلت قوا لعند ابوها وكان جالس بالصالة ومعاه مسباحه  يذكر الله ويحوقل شوي الا يقول : يابوتس وين الفطور استعجلي اليوم عندي اشغال ضرورية وابي اخلصها قبل صلاة الظهر
قوت : ابشر شوي ويخلص الفطور
ابو قوت : اي جعلني ما بكيتس وعلى دربتس صحي تركي
قوت : ابشر الحين يصحى (مشت قوت من عند ابوها وهي تتجه صوب غرفة تركي وشايله هم كيف تصحيه لان نومه ثقيل ويدوب يصحى، قربت من عنده وبصوت عالي لعل يصحى بسرعه : تركييييييي اصحى اخلص ابوي يبيك والساعه ست ونص الوقت راح
تركي بصوت ماينسمع : والله بلشه انتي وش تبين خليني انام
قوت : يالله ماحد بيخرب صباحي غير نومك ياتريكي ياولد ابوي بيعصب وسبب انت (وضربته على ظهره بشكل خفيف لعل يحس على نفسه وفعلاً صحى وهو يمسح على وجهه : يالله صباح خير هذاني جيت
راحت قوت المطبخ وخذت الفطور والقهوة صوب ابوها وجلست مقابلته وهي تصب له القهوة وبدا يتقهوى ويقدع من التمر وما مضى وقت قصير الا تجي ام قوت ( لطيفه) : صباح الخير ياوجيه الخير
ابو قوت: يامرحبا انطحي فالتس
ام قوت : مالي فيه نيه والله المعده اليوم مصبحتني
ابو قوت : ماتشوفين شر اجل
قامت قوت من مكانها وقالت  : يمه بروح اجيب علاجتس
ام قوت : عينيه في المطبخ
راحت قوت المطبخ تجيب الادوية الا تحصل مزون
تسوي فطور قربت قوت من عندها وهي تناظر وش تسوي : وش تخبصين مع هالصبح
فزت مزون من فجعت قوت لها وصوتها المفاجئ: بسم الله الناس تقول صباح الخير وانتي تسالين وش اسوي ، شوفة عينتس اسوي طريقة فرنش توست
ناظرت قوت تخبيص مزون والبيض المفقوش والقرفة المكبوب نصها وكل شي متلخبط وضحكت : اقول عنز وعينت لها مريسه (مزون ناظرتها بنظرات ورجعت تكمل : اقول لاتجيني وتقولين عطيني تشوفين المريسه كيف تطلع يام قرص ،، ضحكت قوت من مسمى ام قرص
وطلعت بعدها  لامها تعطيها الادوية
،،
عند الجد برّاك جالس بحوش بيته عند ضوه وقهوته قرب صوبه النجر وهو يطحن الهيل الا يتفقد اغراضه  ومايحصل المسمار (قرنفل) برّاك بصوت عالي : ياشييخه المسمار وينه
شيخه وهي بالمطبخ تعلم الخادمة الشغل كونها جديده وماتعرف شي الا تنتبه لصوت برّاك يطلب المسمار
اشرت شيخه  للخادمة : جيبي مسمار شوفيه بالدرج اللي عند الغواري ،، الخادمه ناظرت  شيخه بعدم فهم ونظرات استغراب من كلامها ! شيخه كانت وشوي بيطق فيها عرق توجهت صوب الدرج واخذت المسمار وراحت لبرّاك
برّاك كان ياخذ الحطب ويحطه بالضو ويزيد الكمية عشان تجمر ،، وصلت لعنده وهي تعطيه المسمار واخذه من يدها وهو يكمل الا شوي لاحظ عليها انها معصبه
برّاك: علامتس! وش له عقدتن نونه مع ذا صبح
شيخه وهي تبحث بجوالها ( جوالها كشاف ) : ذا الخادمه رفعت ضغطي صلت بي شرق والعرب قبّله
ضحك برّاك وبصوت عالي : ياللي اني في وجهك وتعصبين عشان مسكينه ماتدري وين الله حاطها معليه شوي شوي ماصار لها الا يوم
شيخه : والله ما المسكين الا انا رفعت ضغطي وبس
رجع برّاك يكمل وهو ياخذ غوري القهوة ويصبها بالداله
زفرت شيخه ب لااله الا الله شوي الا تبحث عن رقم ام قوت ( لطيفه) وتتصل مازل ثواني الا وهي راده : لبيه يا عمه
شيخه ابتسمت وتنبسط اذا طلبت شي من لطيفه لانها الحبيبه اللي ماتقدر ترفض الطلب وسمحة قبال : لبيتي في منى جعلني مابكيتس مير ابي قوت تجيني تعلم هالخادمه رفعت ضغطي اقول يمين تقول يسار عجزت فيها ،، ضحكت لطيفه وقالت : ابشري ابشري الحين تجيتس ،قفلت لطيفه من مكالمة الجدة شيخه وتوجهت للغرفة 
...
عند قوت فتحت درجها وهي تاخذ ملف ذكريات فيه كل طفولتها وشهادات التقدير ايام الثانوية وهي تحوس بين الاوراق حصلت صورة صغيره لشخص اخذتها بين كفوفها وهي تزفر بضيق ولهيب الشوق يصلي جوفها : الله يقطع البُعد اللي حرمني شوفك ،، رجعت الصوره بين الاوراق
شوي الا انفتح باب الغرفة الا تلتفت تشوف امها : سمي يمه
ام قوت : روحي لجدتس طالبتس عشان الخادمه الجديده ماتعرف شي ورفعت ضغطها
قامت قوت  تاخذ عباتها  : يلا بروح ولكن قبل بسوي حليب لها اللي تحبه لان قد لي منها حدود اليومين ومابي اجيها ويدي فاضيه
ام قوت : معليه يمتس سوي اللي تبين مير لاتتاخرين
توجهت قوت للمطبخ وهي تسوي حليب الكركم واخذت سلة وحطت الحليب داخلها والاكواب الورقية
.....
عند هيا زوجة العم عايض خلصت من اطعام الغنم ودخلت البيت حصلته هدوء والواضح انهم نايمين للحين ماصحو توجهت لغرفة البنات (زينه واغاريد ) من فتحت الباب ماحصلت الا اغاريد غرقانه بالنوم طلعت هيا وراحت للمطبخ والاكيد بتشوف زينه هناك تسوي فطور ، فعلاً حصلتها تسوي الكرك وخبز چباتي
هيا : زيون انتي هنا ادورتس بالغرفة على بالي نايمه
زينه : يمه الله يهديتس تدرين اني ما نام هالحزه تشوفيني كني دجاجة صاحيه من صبح ،، وضحكت
هيا بضحكة : اخلصي وعطيني الفطور ميته جوع يمتس
زينه اشرت  على خشمها وقالت  : على خشمي يخسى الجوع وانا بنتس يا هيا ،،
ابتسمت هيا وهي تردف : كفو كفو
طلعت هيا  بعدها وجلست بالصالة وفتحت تلفزيون تتفرج عليه...
•عند قوت وهي تمشي متجهه لجدتها الا تحصل بطريقها رجال عند سيارته الا ويلتفت صوبها ويناظرها وتفكر بينها وبين نفسها مو غريب عليها تعرفه ولكن تجاهلت احساسها وكملت مشي حتى استوقفها النداء بالصوت العالي المسموع :انتي قوت؟
وقفت قوت من هول الصدمة والموقف اللي حصل وتمتم بينها وبين نفسها : بسم الله هذا مين وش يبي
شوي الا التفت صوبه واظهرت عكس مابداخلها وناظرته : اي ! وش تبي ومن انت ؟
سعيد بإبتسامه: قولي لااله الا الله ، انا ولد عمتس عايض سعيد وتوني جاي من الرياض
هنا قوت ارتبكت اكثر من درت انه سعيد : اها ياهلا فيك
سعيد : جدي وجدتي وينهم !
قوت استغربت من سواله بالعاده معروفين بالبيت ولكن تذكرت توه يجي الديره واغلب وقته بالرياض بعيد عنهم : جدتي بالبيت واعتقد جدي راح للحلال واستئذنك بكمل طريقي ،،مشت قوت وكملت  طريقها حتى وصلت البيت وقفلت الباب وراها وهي تنادي : يالشوخييييي يانور دنياي وينتس يابعد حيي وميتي ،، عند الجدة شيخه سمعت مناداة قوت وضحكت  ومسكت راسها : يويلي ويلاه اجل انا الشوخي اعقبي وش انتي ياذا البنت ناديني زي المسلمين
جلست قوت  جنبها وحطت الحليب والقهوة : عندي انا الشوخي محبوبة قلبي بعد
الجدة شيخه : ياربي من حكاتس غريب
ناظرتها قوت وغمزت لها : ولكن يجيب راستس
ضحكت الجدة شيخه : صبي لي من القهوة بس
صبت لها قهوة وقربت قدوع التمر صوبها وتقهووا
شوي الا يرن جوال قوت وناظرته تشوف مين المتصل !
الا المتصل بأسم ( زيون)
قوت : يالله صباح خير
زينه: صبحتس الله بالخير تنفستي !
قوت بضحك : حتى اكسجيني سئلتي عنه المهم اسمعي تراني عند جدتي الشوخيييي،،ناظرت جدتها بضحكة وهي تنطق اسم الشوخي وكملت : ومبسوطين بعد تعالي عاونيني على خادمة جدتي نبي نعلمها الشغل
زينه وهي تنقز من مكانها وتاخذ عبايتها : يلا جايه الحين بقو لي قهوة تراني مابعد تقهويت
قوت : معليه لاحقه خير يابنت الحلال تعالي بس
قفلت الاتصال و راحت زينه تركض تستئذن امها واما وقوت راحت صوب الخادمة تشوفها ،،
•عند زينه اللي كانت  تركض وكن احد يلحقها شوي الا تحصل امها قدامها : يمه بروح عند جدتي عندها قوت وطالبيني عشان اعلم الخادمة الشغل
ام زينه : انتي ذالحين يبي لك من يعلمك الشغل
زينه شهقت : جحدتيني يايمه والكرف اللي اكرفه وش تسمينه اجل
ام زينه : افلحي وروحي لهم لاتتاخرين وارجعي قبل صلاة الظهر عشان تركبين الغداء
زينه وهي تمشي : ابشري ( راحت ركض للباب الرئيسي اللي فجاة تصدم بجسم شخص انفجعت : يماااه بسم الله
ضحك سعيد: بسم الله عليتس انتي وش فيتس يالمطفوقه ، زينه هنا استوعبت انه اخوها سعيد الا وضمته : يامرحباااا روعتني ياخوي
سعيد : اخبارتس واخبار امي وابوي
زينه : الحمدالله بخير ناقصنا شوفك
سعيد ببتسامة: دوم يارب الا وين امي وابوي ! وانتي على وين رايحه
زينه : امي داخل وابوي توني مقفله منه يقول انه عند الابل توه واصل وانا رايحه لجدتي
سعيد : يلا اجل انا بدخل وانتي كملي طريقتس وانتبهي ، اشرت زينه على خشمها وكملت الطريق
•مزون بالحوش تنش الملابس بعد ما غسلتهم ودخلت وهي تجهز سناك خفيف وجلست بالصالة وشغلت تلفزيون وتقلب بالقنوات استوقفها مسلسل كويتي وكملت تاكل وتتابع هالمسلسل ، تركي وهو يدخل للبيت  مستعجل  يدور بعيونه على قوت وما حصل الا مزون : مزون قومي قومي سوي قهوة وحطيها بالسيارة حتى اغير ملابسي واجيتس ،،مزون ناظرته من فوق لتحت وتضحك : العلف لاعب فيك انشهد آنك ارفل ماتعرف تشتغل ، تركي فسخ ثوبه باستعجال وقال : فارقيني لافصل عليك الحين اخذي ثوبي اغسليه وخلصي القهوة
،اخذت مزون ثوبه وراحت تغسله وخلصت القهوة ورجعت تكمل المسلسل ، عند ام قوت ( لطيفه ) راحت للغنم ومعاها سطل تعبي فيه حليب الغنم عشان تسوي منه زبد وحليب وفعلاً خلصت المهمة وسكرت باب الشبك وتوجهت لبيتها " شبك الغنم خلف البيت وفيه باب خلفي عند الحوش يفتح على الغنم والحلال كامل "مامّرت دقايق الا دخلت وهي تنادي بأسم مزون ، فزت مزون وهي تسمع امها تنادي والواضح انها اتعبت: لبيه يمه هذاني جيت ،، وصلت عندها واخذت الحليب
ام قوت : شوفي اخذي الصميل وعبيه حليب متى ماتعافيت جيته وجهزته
مزون خذته  ومشت متجها للمطبخ وسوت اللي قالت عليه امها ورجعت لغرفتها تكمل دروسها والبحوث المطلوبة..
•عند سوق الابل والناس مابين بيع ومشترى وسوم
الجد برّاك فارش فرشته مقابل حلاله ويناظر الرايح والجاي ويتقهوى الا يجيه حسين ( ابو قوت ) ويبوس راسه ويديه :سلام عليكم يابوي كيف حالك !
الجد برّاك: بخير جعله به
حسين : كيف الوضع اليوم ،(ومقصده سوم الابل ومايلي ذلك )
الجد برّاك: جاني واحدن خبل وطردته ،،وضحك حسين :وش قومه خبل امحق مشتري
الجد برّاك: اجل يقول سوم الحوار ( ولد الناقه )خمسين الف الوكاد قلت من سبعين الف وفوق غيره مانيب بايع
حسين : يايبه اللي اشوفه الخمسين حلوه مير انت واللي ودك به
الجد برّاك وهو يأشر بيده باتجاه العمال :قوم قوم شوف شغلهم ان كانه ماش عدلهم ، قام حسين من مكانه وهو يتوجه صوب العمال وشيك على الشغل وكل شي تمام
والكل ملتهي بشغله الا شوي تجي سياره نوع جكسار وتوقف عند الجد برّاك ،، الا ينزل من السياره العم عايض : مرحبا مرحبا يابوي كيف انت عساك بخير نفدا راسك ،، ونزل يبوس راسه ويده
الجد برّاك انبسط من شوفة عايض ولانه من اسبوعين ما شافه : تبقى وتحيا طولت ياولدي ماهيب من عوايدك
العم عايض : جعلني فداك شغل وشّديد الابل وماتغرك هالاموار انت من اهلها ،، اومئ براسه : صحيح صحيح مير ذالحين حلالك اللي هنا مين اللي عنده !
العم عايض : فهد والعامل وبين كل مرة اتصل وانشدهم
الجد برّاك: بارك الله فيهم مير مافيه ازين من انك تشرف عليه بنفسك وعيال ذا الوقت مامن حرص ،، وقف العم عايض وهو يستئذن عشان يشوف اهله وكذلك حلاله
وتوجه لبيته...
•عند قوت وزينه بالمطبخ عند الخادمه يعلمونها الشغل وترتيب الاغراض بمحلها الصحيح
زينه وهي تكلم الخادمه : صديق وش اسم انتي !
قوت ضربتها وبقوة على راسها : خير يالخوي تكلمين عامل تراها حرمة وش صديق ، زينه وهي تحك راسها من قو الضربة : اوجعتيني ياختي
قوت خذت  بيد الخادمة وبغت تروح للحوش الا استوقفها يد زينه اللي اخذت الخادمه من اليد الثانيه : وين وين يالطيب خليها تجلس معاي بالمطبخ تخلص بالاول شغلها وبعدين نروح للحوش ،، الا شوي الخادمة تتكلم : ماما انتا كتير مشكلة
وتأشر الخادمه بيدها بشوي شوي هنا قوت فطست من الضحك : شفتي حتى راجيا تكلمت عنتس وعن كثر قرقرتس
زينه  تخصرت وقالت : اقول لسانها طايل وهي توها امشي خلينا نخلص ولا بروح
قوت : زعلت الزعوله شدعوا
زينه وهي تاخد الرطب وتدخله الثلاجة : تخيلي ازعل من شخص غريب لو اني عاد خبل
كملو شغلهم وعلموها الشغل وكل شي وبعدها زينه راحت للبيت وقوت لابست عبايتها وهي توصي راجيا على علاجات جدتها وبالتوقيت اللي حطته مرت صوب غرفة الجدة شيخه تشوفها اذا صاحيه تودعها قبل تطلع وتعطيها خبر انها بتروح ولكن حصلتها نايمه ( غفوة الضحى )
>>>>>
•الرياض الساعه عشر ونص طلع من البيت ومروق لابعد حد وراح يكمل شغله بالكوفي ، وقف ونزل واخذ لاب توب ودخل الكوفي يشوف له مكان ويحط فيه اغراضه وفعلا حصل وحط الاغراض
وتوجه يطلب طلبه ، طلب وخلص ورجع لمكانه وبدا فتح الملفات اللي معاه ويشوف الاوراق ويراجعهم ومدقق فيهم وفي اتم تركيز الا يقطع حبل تركيزه اتصال
( فيصل ) فتح الاتصال وترك اللي بيده : ياهلا ومرحبا
فيصل : ياهلا فيك علومك
لزّام: مامن علوم بالكوفي انجز شغلي
فيصل : اجل دز لي الموقع لان ماعندي شي وبجيك
لزّام: يعني مامن فكة
فيصل بضحكة : حتى ظلي مصاحبك
لزّام بضحكه  : خف علينا يا علاء الدين شويات ويجيك الموقع
قفل لزّام وكمل على اللي بيده ، وبنسبا لفيصل شغل سيارته وتوجه للكوفي ، طبعاً الموقع ماهو بعيد ما استغرق عشر دقايق حتى وصل ودخل وعيونه تدور على زول لزّام
طبعًا شافه من بعيد وأقبل عليه الا يوقف ويناظر جواله يحصل رسالة ( السلام عليكم المحامي فيصل بن سعود !)
رد ( اي نعم امرني ؟ )
بعدها قفل جواله وجلس قبال لزّام وقال : علومك يالحبيب
لزّام يرتب الاوراق ورجعها بالملف وزفر براحة وانجاز : اها الحمدالله خلصت ، ابد عندي كذا قضية اشوف ملفاتهم
فيصل : ابد قدمت على بوابة ناجز بطلب رخصة المحاماة
عقد حواجبه لزّام: الا الحين قد مضى لك ثلاث سنين بالمحاماة غريبة ما اخذت ياخي
فيصل يبي يغير الموضوع لان يضايقه : لزّام قفل على الموضوع اطلب لي شي ابي اروق
لزّام اشر للنادل الا التفت صوب فيصل : وش طلبك ؟
فيصل : بلاك كوفي
النادل : تامر على شي ثاني
فيصل : اي ياليت تشغلون شي لراشد الماجد
النادل اومئ براسه بمعنى تمام ،، لزّام وهو يناظر بالفيصل ونظرات منقود واردف : الحمدالله مالقيت الا راشد الماجد مدري وش تحب بصوته لا كلمات زي الناس ولا صوت
فيصل : لو سمحت كل شي الا رشود بعدين لو قلنا نشغل على ذوقك شغلت فيصل الدحباش تفضحنا يالبدوي
لزّام عطاه نظرات الاستنكاف : خف علينا ياللي مقطوع سرك في ضواحي بيروت ، ناظرو بعضهم ثواني
الا ينفجرون من الضحك.....
•عند ام لزّام ( رزنه ) جالسه تكلم اختها عفايف وتاخذ وتعطي معها بالكلام شوي الا معالي نازله من الدرج وبيدها كوب شاهي |شافت امها تكلم والواضح من طريقة كلامها انها خالتها عفايف، فا عقدت حواجبها والتزمت الصمت |قفلت ام لزّام من المكالمة الا تناظر معالي بنظرات غضب هنا حست معالي بنظرات امها الحاره اتجاهها وعرفت سبب واردفت تقول : يمه لاتناقشيني بموضوع خالتي عفايف وانتي ادرى وش مسويه فيني قدام حريم الجماعة مفشلتني وكني مانيب بنت اختها
ام لزّام: اياً كان السبب هذي اختي وحسبة مقام الام المفروض تسلمين عليها وتكلمينها | طلعت ام لزّام ولا سمحت لمعالي تكمل كلامها زفرت معالي بضيق وسبب ان امها ماتسمع لها ولاتاخذ بكلامها سكتت وكملت تشرب الشاهي
•عند جُمانه اخذت شور بارد ولبست تشيرت ازرق وبنطلون اسود واسع مريح وحطت تنت خفيف على شفايفها وخدودها بعدها راحت  للمطبخ تشوف لها شي تاكله | اخذت قطعة توست بالجبن وكوب عصير وطلعت لصالة الا وتحصل معالي تهوجس واستغربت من هدوءها الغريب الغير معتاد وقالت : وش فيكِ هاديه !
مسكت معالي كوبها ترشف منه القليل ومسحت عليه بأصابعها بهدوء تام : امي ومشكلتها الدائمه معاي وسبب خالتي عفايف
اعتدلت جُمانه بجلستها وقالت : معالي ياروحي تعرفين امي عصبيه واختها وحيدتها مستحيل ترضى عليها وزود على كذا خالتي تحب تهول من الامر
معالي بنرفزه: وانا وش دخلني بتهويل الاموار عندها تفكني من شرها كفاية سببت مشكلة بيني وبين امي
استسلمت جُمانه ومابيدها حيله : الله يصلح الحال
•نرجع لديرة هياما وبتحديد عند تركي اللي رجع البيت بعد ماخلص شغل ابوه وشاف العمال وشغلهم تمام ، دخل وهو مهدود حيله من الكرف اللي جاه | شاف امه تطبخ الغداء ودخل بأس راسها ويدها وقال : اخبارتس يمه
ام قوت : بخير وش فيك تزفر! ( يعني يطرد النفس )
تركي اخذ كوب وعباه مويا بارده وجلس على كرسي الطاولة : يالله الجنة البارده والله انكرفت يايمه وتراني جوييع
ام قوت وهي تقطع الليمون : يخسى الجوع وانا امك ياتركي شويات ويجهز رح بدل ملابسك
قام تركي من مكانه : جعلني ما خلا يلا بروح ذالحين
•قوت بعد ما اخذت شور وبدلت ملابسها نزلت تعاون امها بالغداء | دخلت المطبخ اتجهت لثلاجة اخذت خضروات ورقية بدت تقطعهم وببالها سؤال تبغى تطرحه لامها ومتردده الا اخذت نفس عميق قالت : يمه بسالك عن شي ماضي تجاوبيني بصراحة!
[التفت ام قوت ( لطيفه ) بنظرات استغراب وتعجب من كلامها رجعت تكمل على شغلها : اسئلي خليني اشوف وش مخلي تفكيرتس بالماضي وشقاه ،، ناظرت امها معقده حواجبها من اخر كلمة ((شقاه)) والاكيد فيه مشاكل وحروب تحط وتشّل ، ولكن ماراح ترتاح حتى تحصل اجوبة على كل اسئلتها اللي لها سنين وهي تلج بين ضلوعها ،اردفت بضيق : عمي فارس وينه ؟
هنا ام قوت انصدمت وتجاهلت وكنها ماسمعت شي والواضح انها مرتبكه بدت تاخذ الملاس ( المعلقة ) وتقالب الرز اذا استوى ،، قوت هنا حست على امها وتصرفاتها وعرفت ان الوضع متكهرب ومستحيل تتجاوب معاها | فضلت الصمت وكملت تقطيع وخلصت وحطتهم بالصحون ، واخذت السفرة وهي طالعه : يمه بروح افرش السفرة واجهز اللبن والمشروب البارد ،، اومئت براسها بمعنى تمام...
اجتمعو -مزون -تركي-قوت حول السفرة
تركي وهي يتمغط ( يتمدد ) : اخخخ ياعظامي
مزون : يارجال اللي يشوفك يقول في العسكرية وتسوي بشم مية مرة تراك عند الابل
تركي : ياشينتس تتكلمين وانتي هنا مغير تسدحين ومرتاحة
قوت مصدعه ومنزعجه من كثرة كلامهم : ياربي ودي نجتمع وانت وهي تسكتون ،، ناظرتهم وهي متعقده من كل شي وتأففت
تركي بتعجب : اعقبو عقبتو ياذا البنات انا اخوكم الكبير اقلها احترمو اعطو عمري حقه
مزون ناظرته وقلبت عيونها : يالله والعمر حسستني ثلاثين ترا خمسه وعشرين سنه
قوت بتفكير : الا صدق مابقى شي يدخل ثلاثين يووه طلعت شايب يا تريكي
تركي بشمئزاز وهو يعدل جلسته : بسم الله علي الا توني شباب والعمر مجرد رقم ،، انفجرو ضحك من حركاته واشمئزازه من عمر الثلاثين | الا وتردف مزون : افا ياذا العلم انت ولد حسين وتركيزك على عمر وشيب بالرأس
تركي : انا ابن برّاك حنا مانشيب الا على عز ومعزة
قوت بضحكة : كفو كفو
اقبلت عليهم ام قوت بيدها صحن الغداء وحطته على السفرة | تقدم تركي يسمي بالله : يمال العافية ياجنتي
قوت بستغراب من عدم تواجد ابوها على السفرة : ابوي وينه ماجاء !
تركي : ابوي معزوم عند جدي وقال انه يبيه
سكتو كلهم وعارفين ان الجد برّاك مايطلب احد من عياله الا فيه شي ،، قوت بتفكير بينها وبين نفسها ( الله يستر لايجيب هذاك الموضوع مثل كل سنه ) زفرت بضيق مخبيته بين ضلوع صدرها وللاسف من سنين.....
>><<
•الرياض الساعه خمس ونص مساءً
عند معالي اللي جهزت ولبست عباتها ونقابها بيدها طلعت متجهه لغرفة جمانه تشوفها اذا خلصت بدري || جُمانه كانت تكوي نقابها وشارده بهواجيس وافكار تحط وتشّل ماحست الا بوجع الالم ادركت هنا انها احرقت اصبعها فجاة الا اجهشت بالبكاء ،، دخلت معالي وقتها الا وتشوف منظر اختها وكيف هي بنوبة بكاء تروع ركضت ناحيتها تضمها وتسمي عليها : بسم الله عليكِ وش فيكِ جمانه وش صاير !!
جمانه وهي ترجف: احرقت اصبعي مادريت
معالي ناظرتها بنظرات استغراب ومعقده حواجبها : جمانه لانلعب على بعضنا كل هالبكاء عشانك احترقتي ! مستحيل وش فيكِ
جمانه حست بحرارة نزول الدموع وبداخلها من الانهيارات اللي تهد الحيل : انا وش فيني ماني فاهمه نفسي ! ليش اجيب لنفسي الالم ! ليش الكل يتغير للافضل الا انا ارجع مليون خطوة ورا تعبت يا معالي والله تعبت ،،بدت تبكي بشكل يوجع القلب
بدت تمسح على راسها وتحاول تهدي اعصابها : ياجوجو هذا ابتلاء من ربي وامتحان يختبر فيه قوة صبرك وايمانك ولاعاد تقولين كذا انتي قويه وتقدرين تجتازين كل مرحلة سيئة قومي ناظريني يلا ،، اعتدلت جمانه تناظر بعيون معالي وما عيون جمانه الا تعب وحزن عميق وخوف
كملت وهي تقول : اسمعيني تقومين الحين تغسلين وجهك والبسي عباتك والقهوة اليوم علي يلا عاد مدلعتك ترا لاتخليني اسحب كلامي
جمانه بضحكة مزيفة : طيب حتى الدلع تمنين عليه ،،توجهت تغسل وجهها وطلعت تلبس العباية
معالي راحت تجيب عسل عشان تحطه على حرق اصبع جمانه
الا دخل لزّام وشاف وجهه جمانه وعرف انها باكيه وحس الدنيا
تدور فيه واشتدت اعصابه ويكرهه انه يشوف دموع احد من خواته ،،
قرب صوب جمانه وهو يحط يده على خدها وقال.....