وصل للموقع اللي ارسله فيصل ونزل من سيارته وتوجهه لداخل الا يحصل فيصل جالس قدامه على الطاولة المقابله ، جلس وهو يتنهد بقلة حيله انتبه عليه فيصل الا يقول : علام صدرك يالمحزم ؟
لزام بتشبيك اصابعه بعضها في بعض وهو يقول : تخيل مين اللي جاء من بعد انقطاع سنين
فيصل بتعجب: مين ؟
لزام بضحكة استهزاء : ابوي جاء من بعد انقطاعه عنا سنين وكله عشان شغله وحسبت يوم انه جاي عشان امي وخواتي ويشيل معي الحمل لو شوي الا بيزيده يالفيصل بيزيده
فيصل بعدم فهم لكلامه : وش اللي بيزيد يالزام
لزام : بيزوجوني دانه بنت عمي مسعود المتوفي يقول انها امانه عنده وماحد بيصونها الا انا
فيصل : هو منجده ؟ الدنيا ماهيب خذني جيتك اسمعني ياخوك زين ان كانك ماتبيها لا تاخذها لا تجبر نفسك على شي
لزام : مدري مدري
فيصل بتغيير للجو: الا كيف جو هياما الكئيبه يوم جيتهم
لزام اللي استرجع نشوة الروح في الموقف اللي حصل له في هياما ، تنهد وابتسم هو يقول : اقول لك شي ولا تمسكه علي ؟
فيصل اللي حس على لزّام وتغير وجهه بثواني ، غمز وهو يقول : هات هات وش عندك اني داري وراك شي
لزام : تصادفت انا واخت تركي قوت اللي قضية ولد عمها عندي المهم هالانسانه كل ما شفتها احس بروحي نشوة روح مدري كيف اوصفها ، قد مروّ علي جنس حواء وانت تدري بشغلي وطبيعته ولكن هي غير
فيصل اللي يصفق بيده وهو يضحك يقول : طحت على وجهك يابن عايد ولا احد سمى عليك ،، وكمل : اشوف بعيونك ماتبي تعترف بمشاعرك هذي حتى لنفسك لاتكابر يا لزام لا تكابر
لزام اللي يضيع الموضوع لاجل مايفكر فيه ولا يعطيه مجال : وش طلبت قهوتك ؟
فيصل : تحاول تتهرب معليه معليه ، طلبت ايس امريكانو
لزام : اطلب لي مثلك
اشر على خشمه بمعنى ( على خشمي ) وكمل ينادي النادل..
•طلعوا للمول ولا اهتموا لـ جية مرام وامها ، كملوا يتسوقون الا معالي تأفف ونطقت بتعب : يووهه جمانه بس خميتي كلشي ترا ماراح تهاجرين كله زواج
جمانه اللي شافت فستان بـ لون الموف الا تقول بترجي: تكفين عوعو ابي هالفستان اخر شي خلاص ونطلع
معالي : على عوعو هذي مافيه دلعيني زين ولا انطمي
جمانه سوت سكب لكلامها وتوجهت للمحل ،،
نبعد عن جو المدن وضجتها ، عند هياما| في مزرعة بّراك بالتحديد عند البنات اللي مجهزين الفرشه والقهوه وشابين الضوء وماهي الا دقايق والجد براك عندهم جلسوا حوالينه ، قوت اللي تصب القهوه وزينه اللي تفتح الحلويات ووجد اللي عند براك تناظر بشكله وشخصيته المُهيبه ولكن بعكس البنات الباقين يشوفون بداخله مو بخارجه
براك اللي اخذ فنجال القهوه ورشف منها القليل الا ناظر وجد يقول : وجد قربي لي القدوع
وجد بنظرات عدم فهم وورطه بدت تناظر البنات وكنها تطلب المساعده ،، البنات اللي ضحكوا من نظراتها وعرفوا انها مافهمت الكلمة الا تتكلم قوت : وجد جدي يقصد صحن التمر عطيه
وجد ببتسامة تسليك وفشيله : اها ابشر
براك اللي ضحك وهو يقول : يبي لتس تعليم
عند وجد اللي استغربت ولا اول مرا جدها يتكلم معاها بهالاسلوب والاريحية الا تبتسم وتقول : باذن الله بشرط ؟ انت تعلمني
فجاة مزون نطت الا بجنب براك وهي تقول بحماس : تكفى يابراك انا في وجهك وجاهك ان تلبي لي طلبي
براك اللي ابتسم ونطق بنفس حماسها : جاتس يامزون الحياء
اخذت طرحتها وهي تحطها بحضن جدها براك: كفو ياساس البيت ، اللي ابيه خيل ويصير عندنا مربط بالمزرعه
قوت اللي بخاطرها المربط وحلمها تتعلم ركوب الخيل وهي تنطق بحماس لا يقل عن مزون : اي تكفى ياجد
براك : ابشروا على خشمي
اغاريد: جد حاجينا بـ لغز
براك وهو يعدل جلسته وبتفكير : يلا وش اللي طويل ولا له ظلال ؟
البنات اللي يفكرون الا تنط زينه بحماس وهي تقول : الجبل ياجد
براك : خطا
وجد اللي مو فاهمه بس شاركت وقالت : الظل
مزون بضحك : اقول ليتس ساكته وش دخل يقول ماله ظلال والظل فيه ظلال فهمتي ست وجد
وجد بضحكة على نفسها : صح
قوت وهي تصفق يدينها ببعض وتقول : خذها وانا بنت حسين النظر
صفق وهو يضحك ويقول : بعدي بعدي كيف جبتيها يالشيخه
قوت : جبتها من شيوخي
البنات كلهم بصوت واحد : غش غش
قوت : انطموا انا اللي فزت
الا تقول زينه : جد شرايك نسوي اسئله وانت تجاوبنا
براك : طيب ولكن لا تكثرون راسي بدا يصدع
سكتوا دقايق معدوده الا نطقت زينه بسؤال يراودها من زمان : عمي سعود صدق مات مقتول ؟
السؤال اللي كان مثل الصاعقه على براك وكن الذكريات انهلت عليه بشكل غزير سكت دقيقة وكمل بتنهيده: اي مقتول
اغاريد: طيب مين اللي قتله ؟
برّاك : مهوب ضروري تعرفون مين قفلوا على الكلام
مزون بحسره: يارب مات قصاص ؟
براك اللي ضاقت الدنيا عليه وهو يقول : لا ،، وقام من مكانه
قوت اللي ساكته طول الجلسة لانها عارفه الموضوع ولكن ماتعرف مين القاتل ومن اي عايلة
قوت : حرام ليش يقصونه وهو ما كان متعمد
وجد : كيف حرام طيب دم عمي !
قوت : يابنات اللي حصل لعمي سعود كان قتل بالخطاء وهو خويه كيف يتعمد يقتله بالعقل يعني
مزون : اما اخوياء ؟ ياررب رحمتك
زينه : صح كان متزوج ؟
قوت : اي متزوج ولكن اول ما توفى راحت لاهلها ولا عاد يدرون عنها
وجد وهي تشرب قهوتها : خلاص وش تبي فيهم زوجها توفى وراحت لاهلها
مزون : صح صادقه
..
YOU ARE READING
قوت القلوب اللي من الزمن مبليه
General Fictionان ما لزّمت عهد الهوى والمحبة عقبيني الفنجال من بين الرياجيل - ماكن جيتك لديار جدي وعماني الا قوت القلوب اللي من الزمن مبّليه
