ကုန်းမြေကြီး၏ အရှင်သခင်ဝမ်ဖေး( Book - 2)

အပိုင်း (၅၈) - လျှော်ပင်နှင့် ပင်လယ်တားမြစ်ချက်

Unicode

လန်ရှန်းခြံဝန်း(သစ်ခွမွှေး ခြံဝန်း)

ဝမ်ချင်းလန် က သူမအခန်းထဲသို့ ခြေလှမ်းချလိုက်သည်နှင့် ထိုင်ခုံကို ကန်ချလိုက်လေသည်။

တံခါးရှေ့တွင် ရပ်နေသည့် အစေခံနှစ်ယောက်မှာ ကြောက်ရွံ့မှုကြောင့် အသံပင် မထွက်နိုင်ကြပေ။ တံခါးက ပိတ်ဆို့ထားပြီး သူတို့မှာ အခန်းထဲသို့ မမြင်နိုင်သော်ငြား စားပွဲနှင့် ထိုင်ခုံများ လဲကျနေသံကိုတော့ တစ်ခုပြီးတစ်ခု ကြားနေရချေ၏။ ကိုယ်လုပ်တော်ဝမ် ဒေါသအကြီးအကျယ်ထွက်ပြီး ပစ္စည်းများ တွန်းလှဲပစ်သည်မျိုးကို သူတို့ ကြုံရသည်မှာ ပထမဆုံးအကြိမ်တော့ မဟုတ်ပေ။ အရင်က သူမ အဓိကဇနီးကို ရှုံးနိမ့်သလို ခံစားလာရတိုင်း ထိုသို့ လုပ်နေကြဖြစ်သည်။

သို့သော်လည်း ဝမ်ချင်းလန် က ဖန်ကျန်းပင် ထက် သိသိသာသာပင် ဉာဏ်ကောင်းလေ၏။

လက်ဖက်ရည်ထည့်သည့် ကြွေထည်ပစ္စည်း အစုံလိုက်သည်သာ ကွဲကြေသွားပါက အန်းကျီယန်နှင့် အိမ်တော်ထိန်းဆု မှာ ချက်ချင်းဆိုသလို ရှာတွေ့သွားပေလိမ့်မည်။ သို့သော် စားပွဲနှင့် ထိုင်ခုံတို့မှာမူ ခြားနားသည့် ကိစ္စတစ်ခု ဖြစ်သွားလေပြီ။ အန်းချန်ဖူ သူမကို အရေးပေးစဥ်အခါက သူသည် သူမ ခြံဝန်းဆီသို့ ပစ္စည်းကောင်း အမြောက်အမြား ပေးအပ်ခဲ့သည်။ စားပွဲနှင့် ထိုင်ခုံများမှာ အရည်အသွေးမြင့် သစ်သားဖြင့် ပြုလုပ်ထားပြီး အကြမ်းခံနိုင်စွမ်းလည်း အလွန်ကောင်း၏။ သူမ ဒေါသထွက်လာသည့်အချိန်တိုင်း စားပွဲနှင့် ထိုင်ခုံများ အပေါ် ဒေါသပုံချပစ်သော်လည်း ယင်းတို့မှာ မကျိုးမပဲ့ ရှိနေဆဲပင်။

ခဏမျှ ပေါက်ကွဲပစ်ပြီးနောက်တွင် ဝမ်ချင်းလန်က အစေခံများကို ခေါ်၍ အခန်းအား နေရာတကျ ပြန်ထားသိုစေလိုက်၏။

စားပွဲနှင့် ထိုင်ခုံများမှာ သူ့နေရာနှင့်သူ ပြန်ရောက်သွားကြ၏။ သူတို့တွင် ချိုင့်ရာများနှင့် ကုတ်ခြစ်ရာများ တိုးလာသော်လည်း ပရိဘောဂပစ္စည်းများအသွင်မှ ဖယ်ခွာမသွားပါပေ။

"မင်း...ချီချောင်းကို သွားခေါ်လာခဲ့"

ဝမ်ချင်းလန် က အစေခံများထဲမှ တစ်ယောက်ကို ခိုင်းစေလိုက်လေ၏။ ချီချောင်းမှာ သူမ ယုံကြည်ရသည့်သူ ဖြစ်သည်။ သူမက ဝမ်ချင်းလန် အန်းမိသားစုထဲ လက်ထပ်သွားစဥ်ကပင် လိုက်ပါလာခဲ့သူ ဖြစ်ပြီး၊ ဝမ်ချင်းလန် ယုံကြည်ရသည့် တစ်ဦးတည်းသောသူ ဖြစ်၏။