ကုန်းမြေကြီး၏ အရှင်သခင်ဝမ်ဖေး( Book - 2)

အပိုင်း (၇၉.၁) - အပြစ်ပေးခြင်း

Unicode

အပိုင်း (၇၉.၁) - အပြစ်ပေးခြင်း

ကျူးချန် ထွက်သွားပြီးနောက် အန်းကျီယန်နှင့် ဖူဝူထျန်းတို့သည် အန်းနန်းဆောင် ကို တစ်ပတ်ထပ်ပတ်လိုက်သည်။

အန်းနန်းဆောင် က တွေးထက်သည်ထက် ပိုမို ကြီးမားပေသည်။ အန်းမိသားစု မှ လူများအားလုံး ဤနေရာတွင် နေထိုင်ကြမည် ဆိုလျှင်ပင် ဤနေရာက ပိုမို ကျယ်ပြန့်နေသေးဟန်ရသည်။ သူတို့နှစ်ဦး ပြန်လာပြီးနောက် ဖူဝူထျန်းက သူ့နန်းတော်မှ အစေခံအချို့ကို အန်းနန်းဆောင် သို့ သန့်ရှင်းရေး သွားလုပ်ရန် အမိန့်ပေးလိုက်၏။

အန်းနန်းဆောင် ကို လွန်ခဲ့သည့် ခြောက်လခန့်က ဆောက်လုပ်ထားခြင်း ဖြစ်သော်ငြားလူသူ မရှိသည်မို့ စားပွဲများနှင့် ထိုင်ခုံများထက်တွင် ဖုန်အလွှာအထပ်ထပ် တင်နေပေသည်။ အစေခံများသည် အားလုံးကို သန့်ရှင်းပြီးရန်အတွက် အချိန်နှစ်ရက် ယူခဲ့ရ၏။

တတိယမြောက်နေ့တွင် အန်းမိသားစုဝင်များသည် အန်းနန်းဆောင်သို့ ပြောင်းလာခဲ့ကြသည်။

"သခင်မ...ကြည့်ပါဦး။ အန်းနန်းဆောင်က အရမ်းကြီးတာပဲ"

ဝမ်ချင်းလန် နောက်၌ ရပ်နေသည့် ချီချောင်းက အန်းနန်းဆောင် ကို မြင်သည်နှင့် ချက်ချင်းဆိုသလိုပင် ရင်သပ်ရှုမောသွားလေသည်။ အန်းအိမ်တော် က ဤနန်းဆောင်နှင့် လုံးဝကို နှိုင်းယှဥ်၍ မရပါချေ။ သူမ ကျွင်းကျီမြို့သို့ မလာမီက အန်းအိမ်တော် သည် အန်းယွမ်စီရင်စု၌ အကြီးဆုံး ဖြစ်သည်မို့ အန်းမိသားစု က အတော်အတန်ကြီးမားသည် ဟု တွေးထားခဲ့မိ၏။

ဝမ်ချင်းလန် က သူမ၏ ခေါင်းကို မော့ကာ ကျယ်ပြန့်ကြီးမားသည့် အန်းနန်းဆောင် ကို ကြည့်လိုက်သည်။ သူမ၏ မျက်ဝန်းများက ယုံကြည်မှု နှင့် ရည်မှန်းချက် တို့ဖြင့် ပြည့်နှက်နေလေသည်။

နောက်ဆုံးတွင် သူမက ကျွင်းကျီမြို့သို့ ရောက်ရှိလာပြီ ဖြစ်ပြီး ဧကရာဇ် ကိုယ်တိုင် ပေးအပ်ထားသည့် အိမ်တော်၌ပင် နေထိုင်နေရလေပြီ။ အရင်က သူမတွင် ဤကဲ့သို့ အတွေးမျိုး မတွေးရဲသော်ငြား မြို့တော်သို့ ရောက်ကတည်းက သူမသည် သူမအရင်က မြင်ဖူးကြားဖူးရန် အခွင့်အရေးမရခဲ့သော မျက်စိပွင့် နားပွင့်မှုနှင့် ကြုံတွေ့လိုက်ရသည်။ ဤသည်မှာ အတော့်ကို တုန်လှုပ်ဖွယ်ရာ ဖြစ်သော်ငြား သူမ၏ အတွင်းစိတ်အောက်ခြေ၌မူ ဤနေရာသည် သူမ ရှိသင့်သည့်နေရာဟု ခံစားမိနေလေသည်။