ကုန်းမြေကြီး၏ အရှင်သခင်ဝမ်ဖေး( Book - 2)

အပိုင်း (၆၈.၂) - တိုက်ဆိုင်မှု

Unicode

အပိုင်း (၆၈.၂) - တိုက်ဆိုင်မှု

ဖူဝူထျန်း က စာရင်းစာအုပ် နှင့် ပတ်သတ်၍ သေချာပေါက် စုံစမ်းစစ်ဆေးပေလိမ့်မည်။ ထိုအခါ၌ ဟုန်စီရင်စုရှိ အရာရှိပေါင်းများစွာ အပြစ်ဒဏ်သင့်သွားပေမည်။ သူ့အနေဖြင့် ကြိုတင်ပြင်ဆင်မှုများ ပြုလုပ်ထားမှသာ ဤကိစ္စကို ချက်ချင်း ရင်ဆိုင်နိုင်မည် ဖြစ်သည်။ ထို့ကြောင့် ယခုချက်ချင်း သူ့အဖိုးကို သတင်းပို့ရပေမည်။

သူ့၏ လှုပ်ရှားမှုများက သတိမထားနိုင်စရာမရှိပေ။

သူတို့က ​ခြေတစ်လှမ်း နောက်ကျနေသော်လည်း မကြာမီမှာပင် ဟုန်စီရင်စု၏ အ​ခြေအနေကို သိရှိသွားလေသည်။

လျှိုဖေးဟုန် က အဖမ်းခံလိုက်ရသည်။ ဟုန်စီရင်စုက သူ့၏ ချုပ်ထိန်းမှုအောက်မှ လစ်လပ်သွား၏။ ယခုအခါတွင် စစ်သည်တပ်က စီရင်စုတရားသူကြီး၏ ကြီးမားလှသော အိမ်တော်ကို ထိန်းချုပ်ထားသည်။ ထိုမျှ ကြီးမားသော ကိစ္စ၏သတင်းသည် အလျှင်အမြန် ပျံ့နှံ့သွားပေ၏။

၎င်းသည် ချုန်းမင်ဧကရာဇ်၏ ရှေ့တော်မှောက်သို့ မှတ်တမ်းလွှာအသွင်ဖြင့် ရောက်ရှိသွားရန် အချိန် သိပ်မကြာလိုက်ချေ။

"အရှင်မင်းကြီး...ဒီ မှတ်တမ်းလွှာကို ကြည့်တော်မူပါမည်လား?"

ကုန်းကုန်း ဝမ်ပင်းက ခေါင်းကို ငုံ့ကိုင်းလိုက်လေပြီး ရင်ခွင်ထဲရှိ ကိုယ်လုပ်တော်နှင့် ချစ်ကြည်နူးနေသော ချုန်းမင်ဧကရာဇ် အား တိုက်ရိုက် မကြည့်တော့ပေ။

ယခုအခါတွင် ချုန်းမင်ဧကရာဇ် နန်းတက်ခဲ့သည်မှာ နန်းသက် နှစ်ဆယ့်ခုနစ်နှစ် ရှိပြီ ဖြစ်ပြီး၊ သူ့၏ သက်တော်မှာ လေးဆယ့်သုံးနှစ်သာ ရှိသေးသော်ငြား အသက်ငါးဆယ်ကျော်ဟု ထင်မှတ်ရသည့် ရုပ်သွင် ဖြစ်နေပေသည်။ ဤ အသက်အရွယ်တွင် သူက ဝိုင်အရက်ကို စွဲလမ်းမက်မောဆဲ ဖြစ်ပြီး တေးဂီတဖျော်ဖြေမှုတို့၌ ယစ်မူးတပ်မက်နေဆဲ ဖြစ်သည်။ မောင်းမဆောင်ထဲရှိ တော်ဝင်မိန်းမပျိုတို့သည်လည်း အရေးပေးမှုကို ရယူဖို့ရာ ယှဥ်ပြိုင်တိုက်ခိုက်နေခြင်းမှ သူတို့၏ သားတော်များကို ထီးနန်း ရရှိဖို့ရာ ရုန်းကန်ထောက်ပံ့ကြခြင်းအဖြစ်သို့ ပြောင်းလဲသွားကြသည်။