နတ်ဘုရားတို့ လျှောက်သောလမ်း Part-1

အခန်း (၄၉) ကံဆိုးခြင်းထဲမှ ကံကောင်းခြင်း

တကယ်တော့ VIP အခန်းထဲမှ စျေးပေးလိုက်သောသူက ရဲ့ချန်ပင် ဖြစ်သည်။ ရဲ့ချန်တစ်ယောက် သူနှင့်စျေးပြိုင်ပေးသောသူ မရှိစေရန် တိတ်တိတ်လေး မျှော်လင့်နေသည်။ အဘယ်ကြောင့်ဆိုသော် သူမှာ ၁၂ သန်းလောက် အသုံးလိုနေသောကြောင့်ပင် ဖြစ်သည်။ တခြား VIP အခန်းမှ လူများကသာ လေလံအပြိုင်ဆွဲလိုလျှင် သူက ဧကန်မုချ ငွေအမြောက်အမြား ကုန်ဆုံးပေလိမ့်မည်။

လျှို့ယွဲ့ " ရဲ့ချန်... ရှင့်ကြည့်ရတာ ဒီရှေးဟောင်းပစ္စည်းကို အတော်လေး စိတ်ဝင်စားပုံပဲနော်။ ဒါက သိပ်ပြီး ရှင်းလင်းမှုမရှိတဲ့ သာမန်ပစ္စည်းလေးပဲကို။ ရှေးတုန်းက ဆင်းသက်လာတဲ့ သာမန်လည်ဆွဲလေး တစ်ခုတောင် ဖြစ်ချင်ဖြစ်နေမှာ "

ရဲ့ချန် " ကျုပ် အဲ့ဒီ့ လည်ဆွဲလော့ကတ်သီးကို စိတ်ဝင်စားတယ် "

ရဲ့ချန်က ၎င်း​၏အသုံးဝင်ပုံအား ရှင်းမပြတော့ပေ။ ရှင်းပြသော်လည်း သူမက နားလည်နိုင်မည် မဟုတ်ပေ။

လေလံကြေညာသူ " လူကြီးမင်းတို့ရှင့်... ဒီပစ္စည်းကို ဘယ်သူမှ မလိုချင်တော့ဘူးလား။ ဒီလိုမှ မဟုတ်ရင် VIP အခန်းက ဆရာက ဒီလည်ဆွဲကို ရသွားပါလိမ့်မယ် "

ရဲ့ချန်တစ်ယောက် ဤလည်ဆွဲအား မည်သူမျှ မလိုချင်သည့်အတွက် အတော်လေးကို စိတ်လှုပ်ရှားလာသည်။ ထိုခံစားချက်က ဖော်ပြ၍ မဖြစ်နိုင်ပေ။

" နှစ်သန်းနဲ့ ငါးသောင်း "

ထိုအချိန်တွင် တခြား VIP အခန်းတစ်ခန်းမှ လေလံဆွဲလိုက်သောအသံအား ကြားလိုက်ရသည်။

ရဲ့ချန်လည်း တခြားလူတစ်ဦးက သူနှင့် စျေးအပြိုင်ပေးလိမ့်မည်ဟု မျှော်လင့်မထားချေ။ ထိုဟာက ရဲ့ချန်တွေးထားသလို လွယ်ကူမည့်ပုံတော့ မပေါ်ပေ။

​စျေးပြိုင်ပေးလိုက်သော ဒုတိယလူဟာ အမျိုးသမီးတစ်ဦးပင် ဖြစ်သည်။ သူမက ရဲ့ချန်​၏ ညာဘက်အခန်းတစ်ခန်းမှာ နေရာရပုံပေါ်သည်။

" နှစ်သန်းနဲ့ ခြောက်သောင်း "

ရဲ့ချန် အံကိုတင်းတင်းကြိတ်လိုက်ပြီး သူမနှင့် စျေးပြိုင်ပေးလိုက်တော့သည်။